يعني اعطيك الثقه وتردها بلوي الذراع

لو خسرتك ماخسرت العمر والدنيا متاع
وأدري إني لو خسرتك ماخسرت إلا القليل ..

بس فكر زين .. تعرف من خسر فينا وضاع
وتعرف إنك لو تلف الأرض .. وتدور بديل ..

والله إن تبطي .. ولو لفيت كل البقاع
ولو تسوي وش تسوي ماأنت لاقي لي مثيل ..

وين تلقى مثل شخصي شخص .. وطباعي طباع
ووين تلقى مثل قلبي قلب ..أو مثلي خليل ..

البشر واحد نعم لكن .. فرق الإنطباع
يجعلك يمّي تميل .. ويم غيري ماتميل ..

يآرفيقي إنتبه..! وأحسن إلي الإستماع
للمواقف دور في كشف المزيف .. والأصيل ..

وأنت ماقصرت فيني .. موقفك جداً شجاع
طعنتك بالظهر فعلاً كانت إثبات ودليل ..

بيض الله وجهك اللي ساترهـ تحت القناع
ورايتك بيضا معاي وياعسى عمرك طويل ..

يعني أعطيك الثقه وتردها بـ لوي الذراع
ياخي ماشاءالله عليك أبدعت في رد الجميل ..

مدري كيف أشكرك.؟ مدري كيف أرد الصاع صاع .؟
كنت أحســب إنك عزيز النفس..تطلع لي ذليل ..!!

كم وأنا عييت أصدق فيك قدر المستطاع
من غبائي كنت أسكت وأعذرك وأثر الحصيل ..!

ج ـرح قلب .. ميزته في كل يوم الإتساع
ودمع عين ينهمر من ضيقتي .. في كل ليل ..

والله إني كنت أحبك حب .. وأتبعك إتباع
كنت لجل أرضي غرورك بس أسوي المستحيل..

كنت أعمى فيك .. لالا كنت ميــت للنخاع
كنت مدري كيف.؟ لكن كنت صادق معك حيل ..

كنت أمارس في غرامي لك سياسة الإنصياع
وكنت لآغي معك فكرة أعتزل أو أستقيل ..

إندفعت بكل مافيني .. وسوء الإندفاع
يجبر الإنسان أحياناً.. يفكر بالرحيل ..

صدمتي فيك إنت .. خلتني أفكر بإقتناع
إن قتل النفس راحه لو أنا كنت القتيل ..

إنفجر راسي من التفكير .. وإزداد الصداع
كيف أنا بفتك من ج ـرحك ودوشة قالٍ وقيل ..

صرت سيره في حلوق الناس وتالي هالضياع
أنتحر !! معقول.؟ يالله وش هذا الغليل ..

رحمتك يارب لامن ضاقت أمنحني الوساع
إنت حسبي في الزمان الجاير ونعم الوكيل ..

لاغدى مستقبلي والماضي أطراف النزاع
وصفحة الماضي سواد وشيء من هذا القبيل ..

فلازم أنسى لجل أنهي بداخلي هذا الصراع
ولازم أتقوى .. عشان أحقق النصر الجليل ..

وطالما إن الهجوم أفضل وسيله للدفاع
مستحيل أرضخ لو إن الحمل ياربعي ثقيل ..

والبخيل اللي نساني وإشترى فيني .. وباع
يذلف الله لايردهـ .. والله بج ـرحي كفيل ..

وإن سأل عني .. وجاكم بعد فترة إنقطاع
علموه إني نسيته بس أنا ماني بخيل ..

طالما كان السبب في قوتي .. قبل الوداع
بلغوه أقل شيء بخالص الشكر الجزيل ..